გურჯაანში მე-18 საოლქო საარჩევნო კომისიაში არჩევნების დღეს დაწერილი საჩივრების განხილვა ხმაურის ფონზე წარიმართა. „ნაციონალური მოძრაობის“ წარმომადგენლებმა სხდომაზე კომისიის მიერ მიღებული გამამართლებელი გადაწყვეტილებები უსამართლოდ მიიჩნიეს და ოლქის თავმჯდომარეს სიტყვიერად დაუპირისპირდნენ, რის შემდეგაც სხდომა დატოვეს.

გურჯაანის მე-18 საოლქო სარჩევნო კომისია არჩევნების დღეს დაწერილი 27 საჩივრიდან დღეს 6-ს განიხილავდა, მათ შორის "ნაციონალური მოძრაობის" დამკვირვებლის საარჩევნო უბნიდან გაძევების საკითხს, როდესაც ელმირა ბეციაშვილმა საუბნო საარჩევნო კომისიის თავმჯდომარის შენიშვნა არ გაითვალისწინა და კენჭისყრის ოთახში წესების დარღვევით მოქმედებდა.

კომისიამ დღეს განხილული საჩივრებიდან მხოლოდ ერთი დააკმაყოფილა, რომელიც გურჯაანის მე-4 უბანზე ბიულეტენებზე რეგისტრატორების ბეჭდების არქონას უკავშირდებოდა, რაზეც 4 რეგისტრატორს შენიშვნა მისცა.

ოლქში შესულ ადმინისტრაციული ხასიათის სხვა საჩივრების საკითხს კომისია ჯერ კიდევ სწავლობს, რასაც მოგვიანებით განიხილავს.