რუსეთი ოფიციალურ პარიზს მოუწოდებს, საპროტესტო აქციების დროს თავი შეიკავოს გადამეტებული ძალის გამოყენებისგან და ჟურნალისტების უსაფრთხოება უზრუნველყოს. ამის შესახებ რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა.
„ოფიციალურ პარიზს მოვუწოდებთ, თავი შეიკავონ გადამეტებული ძალის გამოყენებისგან და რა თქმა უნდა, ჟურნალისტებთან მიმართებაში საერთოდ არ გამოიყენონ ძალა“, - აღნიშნა ზახაროვამ.
მან ასევე მოუწოდა საფრანგეთის ხელისუფლებას, „არ დაივიწყონ სიტყვის თავისუფლების ნორმები და ჰუმანიზმის საყოველთაო პრინციპებით იხელმძღვანელონ“. „ფრანგული მხარისგან მოვითხოვთ ჟურნალისტების უსაფრთხო მუშაობისთვის საჭირო პირობების შექმნას. ჟურნალისტები პოლიციის სამიზნე არ უნდა გახდნენ“, - აღნიშნა მან.
არსებული ინფორმაციით, საფრანგეთში გამართული საპროტესტო აქციების დროს RT France-ის რვა თანამშრომელი დაშავდა.
