სალომე ზურაბიშვილის ადგილზე რომ ვიყო, სანამ გამოძიება არ დასრულდება და არ გაირკვევა, ზუგდიდის მე-6 საჯარო სკოლის დირექტორის გარდაცვალების მიზეზი რა გახდა, მე ყოველგვარი ინაუგურაციისგან თავს შევიკავებდი, - ამის შესახებ „ინტერპრესნიუსს“ ექსპერტმა სოსო ცინცაძემ განუცხადა.
მისი შეფასებით, სალომე ზურაბიშვილის გაპრეზიდენტებას სკოლის დირექტორის გარდაცვალებამ ჩრდილი უკვე მიაყენა, ხოლო „ნაციონალური მოძრაობის“ მიერ ინაუგურაციის პარალელურად დაგეგმილი აქცია მას „ხასიათს გაუფუჭებს“.
„შეიძლება, „ნაციონალური მოძრაობის“ მიერ დაგეგმილ აქციაზე უფრო ადეკვატური მოთხოვნა ვადამდელი საპარლამენტო არჩევნები იყოს. რასაკვირველია, ლოზუნგი, რომ არა სალომე, არამედ ვაშაძეა პრეზიდენტი, ვერაფერს შეცვლის, მაგრამ ყოველ შემთხვევაში, ზურაბიშვილს ხასიათს გაუფუჭებს და მის პრეზიდენტობას ჩრდილს მიაყენებს. ზუგდიდის მე-6 სკოლის დირექტორის გარდაცვალებით მის გაპრეზიდენტებას ჩრდილი უკვე მიადგა. ყოველ შემთხვევაში, გარდაცვლილის ახლობლებსა და ბევრს სჯერა, რომ ეს მსხვერპლი ზეწოლასა და ფსიქოლოგიურ ძალადობას მოჰყვა. თანაც ის, რომ ამ არჩევნებმა რეკორდულად ბევრი შეკითხვა დატოვა, რასაკვირველია, საჩუქარი არ არის „ოცნებისა“ და ზურაბიშვილისთვის. მე პირადად, ზურაბიშვილის ადგილზე უფრო მეტ თავმდაბლობასა და უბრალოებას გამოვიჩენდი - ინაუგურაციის, შემდეგ წინანდალში 500-600 კაციანი ქეიფის დრო მგონი არ არის, მითუმეტეს, რომ ქვეყანაში შიმშილია, ყველაფერ დანარჩენზე რომ არაფერი ვთქვათ.
სანამ არ გაირკვეოდა, მე-6 საჯარო სკოლის დირექტორის გარდაცვალების მიზეზი მართლა იყო თუ არა განათლების სამინისტროს წარმომადგენლების დაშინება, იძულება და მუქარა, მანამდე, სალომე ზურაბიშვილის ადგილზე რომ ვიყო, ყოველგვარი ინაუგურაციისგან თავს შევიკავებდი“, - განაცხადა სოსო ცინცაძემ.