ეკა ბესელია - საერთოდ რატომ იყო იურიდიულ საკითხთა კომიტეტში სალომე სამადაშვილი, მართალი გითხრათ, ვერ გავიგე
იურიდიულ საკითხთა კომიტეტში საერთოდ რატომ იყო სალომე სამადაშვილი, რომელმაც არც რეგლამენტი იცის და არც ერთი კანონპროექტი არ წაუკითხავს, მართალი გითხრათ, ვერ გავიგე, - ამის შესახებ ჟურნალისტებს იურიდიულ საკითხთა კომიტეტის თავმჯდომარემ ეკა ბესელიამ განუცხადა, რომელიც სამადაშვილის მიერ იურიდიულ საკითხთა კომიტეტის დატოვებისა და ადამიანის უფლებათა დაცვის კომიტეტში გადასვლის საკითხს გამოეხმაურა.
ეკა ბესელიას თქმით, ის ოპოზიციას არ მისცემს იმის უფლებას, რომ კომიტეტში „მიტინგები მოაწყონ".
„თქვენ უნდა ნახოთ, ყველაზე მეტი გამცდენი სწორედ ოპოზიციის წარმომადგენლები გახლავთ. მუდმივად აგზავნიან წერილებს, რომ ოჯახური მდგომარეობის გამო ვერ ცხადდებიან და ამ დროს, იმავე წუთს შესაძლოა იხილოთ, რომელიმე პოლიტიკურ შოუში. არ კითხულობს არც ერთ კანონპროექტს, მაგრამ ზუსტად ისეთივე ხელფასს იღებს, როგორსაც ნებისმერი ჩვენგანი. ასე რომ, გადაწყვიტონ სად უნდათ იყვნენ. მე ნამდვილად არ მივცემ იმის შესაძლებლობას, რომ აქ მიტინგები მოაწყონ",-განაცხადა ბესელიამ.
შეგახსენებთ, ფრაქცია „ნაციონალური მოძრაობის“ წევრმა სალომე სამადაშვილმა იურიდიულ საკითხთა კომიტეტის დატოვებისა და ადამიანის უფლებათა დაცვის კომიტეტში გადასვლის გადაწყვეტილება მიიღო.
როგორც სამადაშვილმა განაცხადა, ოპოზიციას იურიდიულ საკითხთა კომიტეტში საქმიანობის შესაძლებლობა არ ეძლევა და მის შემადგენლობაში დარჩენას აზრი არ აქვს.
v-if="article.gallery" v-html="article.gallery"
