ეროვნულ ბიბლიოთეკაში თბილისის წიგნის საახალწლო ფესტივალი გაიმართება

საქართველოს წიგნის გამომცემელთა და გამავრცელებელთა ასოციაცია ტრადიციულად, 21, 22, 23 დეკემბერს თბილისის წიგნის საახალწლო ფესტივალს გამართავს.

როგორც „ინტერპრესნიუსს“ საქართველოს წიგნის გამომცემელთა და გამავრცელებელთა ასოციაციიდან აცნობეს, ღონისძება საქართველოს პარლამენტის ეროვნულ ბიბლიოთეკაში გაიმართება.

„თბილისის წიგნის საახალწლო ფესტივალი 21 დეკემბერს ოფიციალურად 13:00 საათზე გაიხსნება და წიგნის გამომცემელთა და გამავრცელებელთა ასოციაცია, ტრადიციულად ამჯერადაც დააჯილდოებს წლის ბესტსელერ გამოცემებს შემდეგ ოთხ ნომინაციაში:

1. თანამედროვე ქართველი ავტორის წიგნი;

2. ქართულ ენაზე თარგმნილი წიგნი;

3. საბავშვო წიგნი;

4. Nonfiction (დოკუმენტური პროზა).

გარდა ამ ოთხი ნომინაციისა, ფესტივალის გახსნის ცერემონიაზე ასევე, დაჯილდოვდება სამი ადამიანი ლიტერატურის პოპულარიზაციაში შეტანილი განსაკუთრებული ღვაწლისთვის“, - ნათქვამია საქართველოს წიგნის გამომცემელთა და გამავრცელებელთა ასოციაციის მიერ გავრცელებულ ინფორმაციაში.

ღონისძიების ოფიციალური პარტნიორია საქართველოს პარლამენტის ეროვნული ბიბლიოთეკა და აშშ-ის საელჩო საქართველოში. ფესტივალის მედიაპარტნიორები არიან „პალიტრა მედია“ და „ტაბულა“.