იურიდიულ საკითხთა კომიტეტის თავმჯდომარის პირველ მოადგილედ გედევან ფოფხაძის არჩევა იმ დროს, როცა ეს მოხდა, იყო როგორც რეგლამენტის, ასევე, გუნდურობის პრინციპის უხეში დარღვევა, - ამის შესახებ საქართველოს პარლამენტის თავმჯდომარემ, ირაკლი კობახიძემ განაცხადა.

კობახიძე გამოეხმაურა დეპუტატ ეკა ბესელიას მიერ გაკეთებულ განცხადებას, რომელმაც თქვა, რომ გედევან ფოფხაძის არჩევა ბიძინა ივანიშვილთან შეთანხმებული იყო.

„რაც შეეხება პირველ მოადგილედ გედევან ფოფხაძის არჩევას იმ დროს, როცა ეს მოხდა, ეს იყო როგორც პროცედურული დარღვევა, რეგლამენტის უხეში დარღვევა, ასევე, გუნდურობის პრინციპის უხეში დარღვევა - ამაზეც ჩვენ არაერთხელ გავაკეთეთ კომენტარი“,- აღნიშნა პარლამენტის თავმჯდომარემ.