დეპუტატი დავით ჭიჭინაძე გამოკითხვაზე დაიბარეს
შინაგან საქმეთა სამინისტრომ დეპუტატი დავით ჭიჭინაძე გამოკითხვაზე დაიბარა. ამის შესახებ „ინტერპრესნიუსს“ შს სამინისტროდან აცნობეს.
„საჯაროდ გაკეთებულ განცხადებაზე, რომელიც შესაძლოა შეიცავდეს პირადი ცხოვრების საიდუმლოს ხელყოფის დანაშაულის ნიშნებს, შინაგან საქმეთა სამინისტროს ცენტრალური კრიმინალური პოლიციის დეპარტამენტმა გამოძიება 157 პრიმა მუხლის - პირველი და მეორე ნაწილებით დაიწყო. დეპუტატი დავით ჭიჭინაძე დაბარებულია გამოკითხვაზე“, - ნათქვამია ინფორმაციაში.
დავით ჭიჭინაძეს უწყებაში გამოკითხვაზე უკვე ელოდებიან.
შეგახსენებთ, რომ დეპუტატმა დავით ჭიჭინაძემ კომიტეტის სხდომაზე განაცხადა, რომ სოციალურ ქსელში ვრცელდება პირადი ცხოვრების ამსახველი ფარული ჩანაწერი.
„სოციალური ქსელებით გავრცელდა სიბინძურე, რაც მიანიშნებს, რომ რაც აქამდე ხდებოდა და დაუსჯელი გახდა, იძლევა საშუალებას, რომ ანგარიშები ასეთი ბინძური ფორმით ასწორონ“, - განაცხადა დავით ჭიჭინაძემ.
v-if="article.gallery" v-html="article.gallery"
