სამების საკათედრო ტაძრის ახალგაზრდულ ცენტრში ხვალ საქართველოს საპატრიარქო მორიგ შეხვედრას გამართავს.
როგორც „ინტერპრესნიუსს“ საპატრიარქოდან აცნობეს, შეხვედრის თემა „ოჯახურ პრობლემებთან დაკავშირებული სამართლებრივი რეგულაციებია“.
შეხვედრაზე მიწვეულია პარლამენტის, შინაგან საქმეთა სამინისტროს, იუსტიციის სამინისტროს, ჯანდაცვის სამინისტროს, განათლების სამინისტროს, სახალხო დამცველის აპარატის, საქართველოს ადვოკატთა ასოციაციის, ადგილობრივი და საერთაშორისო არასამთავრობო ორგანიზაციების და საზოგადოების წარმომადგენლები.
სამების საკათედრო ტაძრის ახალგაზრდულ ცენტრში სხვადასხვა პრობლემატურ საკითხებზე შეხვედრები პატრიარქის კურთხევით პერიოდულად იმართება.