გამარჯვება და დამარცხება ჩემთვის იზომება არა იმით, ვის რა თანამდებობა შერჩება, იზომება იმით, ვინ შეძლებს მართლაც ღირებულებების და ფასეულობების დაცვას, საკუთარ თავს ვინ მოერევა ამ ცდუნების დროს და ვინ არ გადააბიჯებს ამ ღირებულებებს, - ამის შესახებ პარლამენტის იურიდიულ საკითხთა კომიტეტის ყოფილმა თავმჯდომარე ეკა ბესელიამ ჟურნალისტებს დასმული კითხვის საპასუხოდ განუცხადა.

ჟურნალისტები ბესელიასგან დაინტერესდნენ, თუ როგორ აპირებს ის პარლამენტში ზარდიაშვილის ჯგუფზე გამარჯვებას მაშინ, როდესაც ამ ჯგუფს მხარს ბიძინა ივანიშვილი უჭერს.

როგორც ბესელიამ აღნიშნა, ის დამარცხებული არასოდეს იქნება, რადგან ღირებულებებისთვის არ გადაუბიჯებია.

"პირველ ეტაპზე ჩვენ გავიმარჯვეთ იმიტომ, რომ ის ავი ზრახვა, რაც ამ ჯგუფს ჰქონდა, რომ მიეღწიათ 10-კაციანი სიის მხარდაჭერისთვის და გაემწესებინათ ის მოსამართლეები ჩვენი ხელით უზენაეს სასამართლოში, ეს ვერ იყო მიღწეული. ეს იყო პირველი გამარჯვება.

რაც შეეხება ამ ეტაპზე პროცესს, რაც ძალიან მნიშვნელოვანია, გამარჯვება და დამარცხება ჩემთვის იზომება არა იმით, ვის რა თანამდებობა შერჩება, იზომება იმით, ვინ შეძლებს მართლაც ღირებულებების და ფასეულობების დაცვას, საკუთარ თავს ვინ მოერევა ამ ცდუნების დროს და ვინ არ გადააბიჯებს ამ ღირებულებებს. თუ ამ ღირებულებებს გადააბიჯებ, ან გადაგაბიჯებინებენ, დამარცხებული ხარ. თუ ეს იმის ფასად ხდება, რომ თანამდებობას ინარჩუნებ, დამარცხებული ხარ. ჩემთვის გამარჯვება-დანარცხების კრიტერიუმები არის ეს - გადააბიჯებ ამ ღირებულებებს და უკუაგდებ თუ არა. მე არასოდეს დამარცხებული არ ვიქნები იმიტომ, რომ დღემდე ასე ვიცხოვრე და იმედი მაქვს, ხვალაც და ზეგაც ასე იქნება. მე ჩემი ღირებულებებისთვის არასდროს გადამიბიჯებია", - განაცხადა ბესელიამ.