„ჯორჯიან უოთერ ენდ ფაუერის“ გენერალური დირექტორი - საოჯახო ტიპის სასტუმროებს გონივრულ ვადას მივცემთ, რომ მოგვმართონ და აბონენტად დარეგისტრირდნენ

სემეკთან ერთად ვიმსჯელებთ და გონივრულ ვადას მივცემთ საოჯახო ტიპის სასტუმროებს, ცვლილების დაკანონების შემდეგ მოგვმართონ და დარეგისტრირდნენ აბონენტებად, - ამის შესახებ GWP-ის გენერალურმა დირექტორმა ირაკლი ბაბუხადიამ, სემეკში საოჯახო ტიპის სასტუმროების სასმელი წყლის ტარიფთან დაკავშირებით გამართული პირველი სამუშაო შეხვედრის შემდეგ განაცხადა.

მისივე თქმით, GWP მიესალმება ცვლილებას, რომელიც საოჯახო ტიპის სასტუმროებისთვის წყლის ჰიბრიდული ტარიფის დანერგვას გულისხმობს და GWP უსასყიდლოდ დაუმონტაჟებს აბონენტებს ჭკვიან მრიცხველებს.

„ცვლილება შეღავათს მისცემს ყველა იმ აბონენტს, ვინც სასტუმრო ტიპის მომსახურებითაა დაკავებული. 20 მ3 -მდე მოხმარება ისევ და ისევ საყოფაცხოვრებო ტარიფით იქნება, 20 მ3- ის ზემოთ - არასაყოფაცხოვრებო ტარიფით. კომპანია სრულიად უსასყიდლოდ დაუყენებს ჭკვიან მრიცხველებს აბონენტებს, რომელიც იმის გაგების საშუალებასაც იძლევა თუ ხდება დაზიანება და წყლის დაღვრა“, -განაცხადა ირაკლი ბაბუხადიამ.

ცნობისთვის, საოჯახო ტიპის სასტუმროების სასმელი წყლის ტარიფთან დაკავშირებით პირველი განხილვა 26 თებერვალს გაიმართა. სამუშაო შეხვედრები სემეკში გაგრძელდება, საბოლოო გადაწყვეტილება კი 26 აპრილამდე გახდება ცნობილი.

ლადო პაპავა - მოსახლეობა პოზიტიური დღის წესრიგის მოლოდინშია
ქართული პრესის მიმოხილვა 01.06.2020
ამირან სალუქვაძე - მიუღებელი რეალობაა - ხელისუფლებას და ოპოზიციას ერთმანეთი აწყობთ