ივანე ჯავახიშვილის სახელობის თბილისის სახელმწიფო უნივერსიტეტში სტუდენტთა ესეების კონკურსის „დამფუძნებელი კრება - 100“ პირველი ეტაპის გამარჯვებულები გამოვლინდებიან. ინფორმაციას თსუ ავრცელებს.
უნივერსიტეტის ცნობით, თსუ-ს რექტორი გიორგი შარვაშიძე დააჯილდოებს კონკურსის პირველ ეტაპზე გამარჯვებულ ორ სტუდენტს. დაჯილდოების ცერემონიალთან ერთად, გაიმართება ქართველ მხატვართა მიერ შესრულებული დამფუძნებელი კრების წევრთა შარჟების გამოფენა.
ასევე, ბიბლიოთეკის მარო მაყაშვილის სახელობის სამკითხველო დარბაზში სტუდენტური სამეცნიერო კონფერენცია გაიმართება, რომელშიც მონაწილეობას მიიღებენ სხვადასხვა უნივერსიტეტების სტუდენტები.
„2019 წლის 12 მარტს საქართველო პარლამენტარიზმის 100 წლის იუბილეს აღნიშნავს. სწორედ 100 წლის წინ, 1919 წლის 12 მარტს გაიმართა პირველი საყოველთაო დემოკრატიული არჩევნების შედეგად არჩეული დამფუძნებელი კრების პირველი სხდომა. საქართველოს პარლამენტი ამ თარიღთან დაკავშირებით მართავს სტუდენტთა ესეების კონკურსს „დამფუძნებელი კრება - 100“. კონკურსის პირველი ეტაპი უნივერსიტეტში იმართება. პირველ ეტაპზე გამარჯვებული სტუდენტები კი, უნივერსიტეტის სახელით მონაწილეობას მიიღებენ კონკურსის ფინალურ ეტაპზე“,- ნათქვამია განცხადებაში.
v-if="article.gallery" v-html="article.gallery"