ოკუპირებულ აფხაზეთში გარდაცვლილ 28 წლის ირაკლი კვარაცხელიას სენაკში დღეს დაკრძალავენ.

ირაკლი კვარაცხელია გალის რაიონში, ნაბაკევის სამხედრო ბაზაზე 12 მარტს გაურკვეველ ვითარებაში გარდაიცვალა. წინა დღეს ის დააკავეს. აფხაზეთის დე ფაქტო ხელისუფლების ვერსიით, ირაკლი კვარაცხელიამ თავი მოიკლა. თუმცა, გარდაცვლილის ნათესავებს გავრცელებული ვერსიის არ სჯერათ. ისინი არც კვარაცხელიას ავადმყოფობის შესახებ გავრცელებულ ინფორმაციას ადასტურებენ.

ნათესავების ცნობით, ცხედარს წამების კვალი აღენიშნება. კერძოდ, მათი თქმით, კვარაცხელიას სხეულზე მრავლობითი დაზიანებები აქვს, მათ შორის თავის და ზურგის არეში. თუმცა, ექსპერტების თქმით, ჯერჯერობით დაუდგენელია, ეს დაზიანებები სიცოცხლის დროინდელია თუ არა.

ახლობლების ინფორმაციით, ირაკლი კვარაცხელია ოკუპირებულ აფხაზეთში სეზონური სამუშაოებისთვის გადადიოდა.

კვარაცხელიას გაურკვეველ ვითარებაში გარდაცვალებას დიდი ბრიტანეთის საელჩო „ტვიტერზე“ გამოეხმაურა. როგორც საელჩოს მიერ გავრცელებულ განცხადებაშია აღნიშნული, ფაქტზე „მხოლოდ რუსეთს შეუძლია ამაზე განმარტების გაკეთება. ადამიანის უფლებების დამცველი საერთაშორისო ორგანიზაციების არშეშვება აფხაზეთში და სამხრეთ ოსეთში ასეთ ტრაგედიებს შესაძლებელს ხდის“.

საქართველოში აშშ-ს ელჩის მოვალეობის შემსრულებელი როს უილსონი კი აცხადებს, რომ „ფაქტი აღმაშფოთებელია. ეს ადამიანის უფლებების უხეში დარღვევაა. ჩვენ გვესმის, რომ ეს ხდება, რათა ძირი გამოუთხარონ საქართველოს. ჩვენთვის ეს მიუღებელია“.

ევროკავშირის ელჩის კარლ ჰარცელის განცხადებით კი, მნიშვნელოვანია, რომ რუსეთის ფედერაციამ საქართველოს ხელისუფლებას გარდაცვალების გარემოებებთან დაკავშირებული ყველა აუცილებელი მტკიცებულება გადმოსცეს.

საქართველოს საგარეო საქმეთა მინისტრის, დავით ზალკალიანის განცხადებით, ექსპერტიზის ოფიციალური დასკვნის მიღებისთანავე, საქართველო ყველა საერთაშორისო ბერკეტს მაქსიმალურად აამოქმედებს.