რუსეთის საგარეო საქმეთა მინისტრის სერგეი ლავროვის განცხადებით, მას ეჭვი არ ეპარება იმაში, რომ მიუხედავად არაერთი დარღვევისა, დასავლეთი უკრაინაში გამართულ საპრეზიდენტო არჩევნებს ლეგიტიმურად მიიჩნევს.

რუსულ მედიასთან საუბრისას ლავროვმა აღნიშნა, რომ მოსკოვისთვის ყველაზე მნიშვნელოვანია მინსკის შეთანხმებების შესრულება.

შეგახსენებთ, აღნიშნული შეთანხმება აღმოსავლეთ უკრაინაში კონფლიქტის დასრულებას ისახავს მიზნად. უკრაინაში გამართულ საპრეზიდენტო არჩევნებში რუსეთის მიერ ანექსირებული ყირიმის და პრორუსული ძალების მიერ კონტროლირებადი აღმოსავლეთ რეგიონების მოსახლეობამ ვერ მიიღო მონაწილეობა. რაც შეეხება არჩევნების პროცესის შეფასებას, როგორც საერთაშორისო დამკვირვებლებმა განაცხადეს, საერთო ჯამში არჩევნების პირველი ტური მშვიდად და მნიშვნელოვანი დარღვევების გარეშე ჩატარდა.

იხილეთ ვიდეო: სერგეი ლავროვის თქმით, მას ეჭვი არ ეპარება რომ უკრაინის საპრეზიდენტო არჩევნებს დასავლეთი ლეგიტიმურად აღიარებს