ჭყონდიდელი მიტროპოლიტი მეუფე პეტრე „ქართული ოცნების“ თავმჯდომარე ბიძინა ივანიშვილთან შეხვედრაზე საუბრობს. როგორც მეუფე პეტრემ „რუსთავი 2“-ს განუცხადა, ჭყონდიდის ეპარქიაში მისულ ბიძინა ივანიშვილთან საუბრისას ე.წ. ციანიდის საქმეზეც ისაუბრეს. მისივე თქმით, არჩევნებთან დაკავშირებით ბიძინა ივანიშვილთან საუბარი არ ყოფილა.

„მე ამას უფრო დავარქმევდი სამეგრელოში მომლოცველობას. მე ასეთი დამოკიდებულებით შევხვდი სტუმარს. გულთამხილავი მხოლოდ უფალია და მე ვერ ავიღებ ჩემს თავზე ამ პასუხისმგებლობას. ღმერთმა იცის ვინ რა გულით მოდის ტაძარში“, - განაცხადა ჭყონდიდის მიტროპოლიტმა.

ამასთან მეუფე პეტრეს ინფორმაციით, საუბარი შეეხო ციანიდის საქმესაც.

„შარში რომ გაეხვა, როგორც ხელისუფლება, ისე ეკლესია, ციანიდის საქმით, მე ვკითხე და როგორი დასკვნაც გამოვიტანე, საპატრიარქოს პასუხისმგებლობაა ახლა მისი შეწყალება. ხელისუფლებას არანაირი პრობლემა არ აქვს, რომ საპატრიარქომ იშუამდგომლოს და პრეზიდენტმა შეიწყალოს“, - აღნიშნა მეუფე პეტრემ.