რელიგიური მოტივით სავალდებულო გაწვევაზე უარის თქმა მსოფლიოში აპრობირებული პრაქტიკაა, მაგრამ რელიგიური მოტივი ნამდვილი და დასაბუთებული უნდა იყოს - ეს არ უნდა იყოს მანიპულაციის საგანი, - ამის შესახებ დღეს პარლამენტში თავდაცვის მინისტრმა ლევან იზორიამ განაცხადა.
მინისტრის თქმით, ვინც რელიგიური მოტივით სავალდებულო სამხედრო სამსახურს არ მოიხდის, მას ალტერნატიული სამსახურის გავლის საშუალება უნდა ჰქონდეს.
“ეს უკავშირდება ვალდებულებას და არა იძულებას. მაგალითად, ლიეტუვაში საკონსტიტუციო სასამართლომ აღნიშნულ ჩანაწერთან დაკავშირებით გადაწყვეტილება მიიღო, რომ აქ არავითარ დისკრიმინაციას ადგილი არა აქვს. არ შეიძლება რელიგიური ნიშნით ეს მოვალეობა მოქალაქეებს სხვადასხვანაირად დავაკისროთ, არამედ თანასწორობის პრინციპის გათვალისწინებით მიდგომა ყველას მიმართ თანაბარი უნდა იყოს“, - განაცხადა ლევან იზორიამ.
პარლამენტის პლენარულ სხდომაზე “მინისტრის საათის“ ფორმატში თავდაცვის მინისტრს ლევან იზორიას უსმენენ.