ეკა ბესელია - მოსამართლეთა სიის ზაფხულში დამტკიცების მცდელობა იქნება, რადგან ხელისუფლებას აქვს მოლოდინი, რომ საზოგადოება ყურადღებას მოადუნებს

დამოუკიდებელი დეპუტატი ეკა ბესელია არ გამორიცხავს, რომ უვადოდ გასამწესებელ მოსამართლეთა სია პარლამენტმა ზაფხულში განიხილოს და მხარი დაუჭიროს. როგორც დეპუტატმა „ინტერპრესნიუსთან“ საუბრისას განაცხადა, ხელისუფლებას აქვს მოლოდინი, რომ საზოგადოება ყურადღებას მოადუნებს და მარტივად დაუჭერს მხარს სასურველ კანდიდატებს, როგორც ეს დეკემბერში სურდათ. დეპუტატის თქმით, ჩანაფიქრი კრახით დასრულდება, რადგან საზოგადოება ამ საკითხზე მგრძნობიარეა და აღნიშნავს, რომ ის და მისი მომხრეებიც არ აპირებენ ყურადღების მოდუნებას.

"კონკრეტული გვარების განხილვა ალბათ იქნება ზაფხულისთვის, როგორც დეკემბერში, წლის ბოლოს იყო, რადგან არავის ეცალა ამ მოსამართლეთა კანდიდატების განხილვისთვის და ეგებ ჩქარა გაეტანათ. ეს ვერ მოახერხეს, რადგან ჩემი და ჩემი მეგობრებისგან შეხვდათ წინააღმდეგობა. ახლაც იქნება ამის მცდელობა ზაფხულში, როდესაც მოდუნებულია ყურადღება, მაგრამ ვფიქრობ ეს ილუზიაა. ეს საზოგადოებისთვის იმდენად მგრძობიარე თემაა, არა მგონია ამას მოდუნებული შეხვდეს საზოგადოება, ყოველი შემთხვევისთვის ჩვენ ფხიზლად ვიქნებით",- განაცხადა ეკა ბესელიამ.