საქართველოს კონკურენციის სააგენტოს თავმჯდომარემ ნოდარ ხადურმა კონკურენციის სამართლის საკითხებზე სემინარი გახსნა, რომელიც ამერიკის შეერთებული შტატების ვაჭრობის დეპარტამენტის კომერციული სამართლის განვითარების პროგრამის (CLDP), აშშ-ის ვაჭრობის ფედერალური კომისიის, აშშ-ის იუსტიციის დეპარტამენტის, აშშ-ის საელჩოს და საქართველოს კონკურენციის სააგენტოს თანაორგანიზებით იმართება. სემინარის თემაა „დომინანტური მდგომარეობის ბოროტად გამოყენების გამოვლენა და პრევენცია“.
სამდღიანი სემინარი საქართველოში აშშ-ის სახელმწიფო დეპარტამენტის დაფინანსებით ტარდება.
საქართველოს კონკურენციის სააგენტოს ინფორმაციით, დამსწრე საზოგადოებას სიტყვით მიმართა ამერიკის შეერთებული შტატების საელჩოს ეკონომიკური სამსახურის უფროსმა, მაქენზი როუმ. სემინარს უძღვებიან: აშშ ვაჭრობის ფედერალური კომისიის საერთაშორისო ურთიერთობის ოფისის ასოცირებული დირექტორი, რასელ ვ. დამტოფტი; CLDP-ის ადვოკატის მრჩეველი სქიფ მარკი, აშშ-ის იუსტიციის დეპარტამენტის ადვოკატი იჰან კიმი.
„აღნიშნულ სემინარში მონაწილეობას იღებენ: კონკურენციის სააგენტოს თანამშრომლები, მარეგულირებელი ორგანოების, ბიზნეს ასოციაციების, საკონსულტაციო კომპანიების და სხვადასხვა ბაზარზე მოქმედი ბიზნეს სუბიექტების წარმომადგენლები. სემინარზე განიხილება შემდეგი საკითხები: დომინირებული მდგომარეობის კონცეფცია; ბაზრის განსაზღვრება, საბაზრო წილები და საბაზრო ძალაუფლების მიმოხილვა; საქართველოში დომინირებული მდგომარეობის ბოროტად გამოყენების შემთხვევები, შეფასება, დაუშვებლობის პრევენცია; მტაცებლური ფასები, როგორც დომინირებული მდგომარეობის ბოროტად გამოყენების ერთ-ერთი ფორმა; რეგულირება და კონკურენცია, საგამოძიებო უფლებამოსილებები, ინსტიტუციური მოწყობა და სხვა“ , - აღნიშნულია საქართველოს კონკურენციის სააგენტოს მიერ გავრცელებულ ინფორმაციაში.
ღონისძიება 10-12 აპრილს, სასტუმრო „ბილტმორში“ იმართება.