საპენსიო სააგენტომ მიმდინარე წლის 4 თვეში რეკლამაზე 9 ათასამდე ლარი დახარჯა. აღნიშნულის შესახებ სააგენტოს დირექტორმა ლევან სურგულაძემ საკანონმდებლო ორგანოში, დარგობრივი ეკონომიკისა და ეკონომიკური პოლიტიკის კომიტეტის სხდომაზე, სიტყვით გამოსვლისას განაცხადა. სურგულაძემ წინა წელს სარეკლამო მომსახურებისთვის გაწეული ხარჯებიც მიმოიხილა.

„ჩვენი სარეკლამო ხარჯი 2018 წლის სექტემბერ-დეკემბერში იყო 3 ათასი ლარი და კლიპის დამზადება დაგვიჯდა 4 870 ლარი. ახლა ამ ეტაპზე, იანვრიდან აპრილის ჩათვლით სარეკლამო საქმიანობაში დახარჯული გვაქვს 8 ათას 982 ლარი“, - განაცადა სურგულაძემ.

მთლიანად რა თანხაა ჩადებული სააგენტოს ბიუჯეტში 2019 წელს სარეკლამო მომსახურებისთვის, კომიტეტის სხდომაზე არ დაკონკრეტებულა.