ბლოკი „ევროპული საქართველო - თავისუფალი დემოკრატების” მაჟორიტარი დეპუტატობის კანდიდატი, შალვა შავგულიძე, ორბელიანის ქუჩაზე მთაწმინდის ამომრჩეველს შეხვდა. როგორც „ინტერპრესნიუსს“ „თავისუფალი დემოკრატების“ პრესსამსახურიდან აცნობეს, მთაწმინდელებსაც, თბილისის სხვა რაიონების მსგავსად, მძიმე სოციალური და ეკონომიკური პრობლემების გარდა, ინფრასტრუქტურული პრობლემები აწუხებთ. სახლები, რომლებსაც ისტორიული ძეგლის სტატუსი აქვთ მინიჭებული, ჩამონგრევის ზღვარზეა. შალვა შავგულიძის განცხადებით, საზოგადოებამ საკმაოდ ადროვა "ქართულ ოცნებას" და ახლა უკვე მოქალაქეების აბსოლუტურ უმრავლესობაში არის იმის განწყობა, რომ უნდა მოხდეს ცვლილებები.

„ვაგრძელებ შეხვედრებს მთაწმინდელ ამომრჩეველთან, ყველგან არის ერთი და იგივე განწყობა. ყველა თანხმდება იმაზე, რომ ხელისუფლება უნდა შეიცვალოს და ძალიან მოხარულები იქნებიან, თუ ეს დაიწყება მთაწმინდის ოლქში ცვლილებით. მთავარი მიზეზი არის ის, რომ არც ერთი დაპირება, რომელიც „ქართულმა ოცნებამ“ 2012 წელს გასცა, არ არის შესრულებული. არ შეასრულა სასამართლო სისტემაში სამართლიანობის დაბრუნების დაპირება, არ შეასრულა ეკონომიკის სფეროში დაპირებები: იაფი ფული, სამუშაო ადგილები და ა.შ.“, - განაცხადა შალვა შავგულიძემ.