ეკა ბესელია - პლენარული სხდომების რეგლამენტის დარღვევით დაწყება ტრადიციად იქცა - სხდომა დღის წესრიგის დამტკიცების გარეშე დაიწყო
“ქართული ოცნების“ ყოფილი წევრის ეკა ბესელიას შეფასებით, პარლამენტის პლენარული სხდომების რეგლამენტის დარღვევით დაწყება ტრადიციად იქცა.
ბესელიამ სხდომის წამყვანს ირაკლი კობახიძეს მიმართა, რომ პლენარული სხდომა დღის წესრიგის დამტკიცების გარეშე დაიწყო, რითაც რეგლამენტი დაირღვა.
ამასთან, ბესელიამ უზენაესი სასამართლოს მოსამართლეების არჩევის წესზე მის მიერ ინიცირებული საკანონმდებლო პაკეტის წინა საკითხად გადმოტანა და განხილვა მოითხოვა. მან პლენარულ სხდომაზე ასევე დააყენა უმრავლესობის საკანონმდებლო პაკეტის მესამე მოსმენიდან მეორე მოსმენაზე დაბრუნების საკითხი.
“ვენეციის კომისია არის ევროსაბჭოს მიერ დაკომპლექტებული კომისია. მისი რეკომენდაციების შესრულება არის ძალიან მნიშვნელოვანი. თუ პატივისცემის დემონსტრირება გინდათ, ეს სწორედ ვენეციის კომისიის რეკომენდაციების გაზიარება იქნება“, - განაცხადა ეკა ბესელია.
პარლამენტის თავმჯდომარემ ბესელიას პასუხად აღნიშნა, რომ მისი საკანონმდებლო ინიციატივა სესიაზე დღეს, დღის წესრიგის შესაბამისად გავა.
v-if="article.gallery" v-html="article.gallery"
