შალვა შავგულიძე - მნიშვნელობა არა აქვს ვისი სახელით შეეცდება ივანიშვილი „რუსთავი 2“-ის დაპატრონებას და მის გაჩერებას - ჩვენ ეს არ უნდა დავუშვათ

ბიძინა ივანიშვილმა ყველა სახელისუფლებო შტო ერთპიროვნულად დაიქვემდებარა და „რუსთავი 2“-ის წინააღმდეგ ახალი შეტევა წამოიწყო, - ამის შესახებ ბლოკის „ევროპული საქართველო - თავისუფალი დემოკრატების“ მაჟორიტარი დეპუტატობის კანდიდატმა შალვა შავგულიძემ ტელეკომპანიის გარშემო მიმდინარე პროცესების შეფასების დროს განაცხადა.

შალვა შავგულიძის თქმით, ისინი ბიძინა ივანიშვილს მედიის დამოუკიდებელ ნაწილის „დაპყრობის“ საშუალებას ისინი არ მისცემენ.

„ჩვენს ქვეყანაში დემოკრატიის ბოლო ბასტიონი, რომელიც ჯერ კიდევ სრულად ვერ დაიპყრო ბიძინა ივანიშვილმა არის მედიის დამოუკიდებლად დარჩენილი ნაწილი. სწორედ ამ მედიის ფლაგმანის, „რუსთავი2“-ის წინააღმდეგ დაიწყო ახალი შეტევა ივანიშვილმა, რისი მომსწრენიც გუშინ გავხდით. არა აქვს მნიშვნელობა თუ ამჯერად ვისი სახელით შეეცდება ბიძინა ივანიშვილი „რუსთავი 2“-ის დაპატრონებას და მის გაჩერებას - ჩვენ ეს არ უნდა დავუშვათ.

უნდა გვახსოვდეს, რომ ეს არის ბრძოლა ჩვენს ქვეყანაში დემოკრატიისა და შესაბამისად, საქართველოს სახელმწიფოებრივი დამოუკიდებლობის გადასარჩენად, და ეს ბრძოლა ყველამ ერთად, ვისთვისაც ძვირფასია ჩვენი ქვეყნის ცივილიზებული მომავალი, აუცილებლად უნდა მოვიგოთ“,- აცხადებს შალვა შავგულიძე.