სახელმწიფო ინსპექტორს პერსონალურ მონაცემთა დაცვის ინსპექტორის უფლებამოსილების ვადის გასვლამდე აირჩევენ
პარლამენტმა გამარტივებული წესით, 83-ხმით დაამტკიცა ცვლილებები, რომლის გათვალისწინებით, სახელმწიფო ინსპექტორს პერსონალურ მონაცემთა დაცვის ინსპექტორის უფლებამოსილების ვადის გასვლამდე აირჩევენ.
“სახელმწიფო ინსპექტორის სამსახურის შესახებ“ კანონში ვადების ცვლილებით შესაძლებელი ხდება პარლამენტის მიერ ახალი სახელმწიფო ინსპექტორის არჩევა 2019 წლის 1 ივლისამდე. ამასთან, დასახელებულ ვადამდე სახელმწიფო ინსპექტორის უფლებამოსილებას მოქმედი პერსონალურ მონაცემთა დაცვის ინსპექტორი შეიძენს, რომელიც საკუთარ უფლებამოსილებებს “სახელმწიფო ინსპექტორის სამსახურის შესახებ“ კანონის შესაბამისად განახორციელებს.
“ცვლილებების არსი შემდეგში მდგომარეობს: თუკი ჩვენ დღეს ავირჩევთ ინსპექტორს, არსებული კანონით ისევ პერსონალურ მონაცემთა დაცვის ინსპექტორი უნდა ავირჩიოთ, მაშინ როდესაც 1-ელი ივლისიდან სახელმწიფო ინსპექტორის სამსახური უნდა ამოქმედდეს. ეს უხერხულობა რომ არ შეიქმნას, მიზანშეწონილია საკანონმდებლო ცვლილებები“, - განმარტა იურიდიულ საკითხთა კომიტეტის თავმჯდომარემ ანრი ოხანაშვილმა პარლამენტის რიგგარეშე სხდომაზე.
სახელმწიფო ინსპექტორის სამსახური, რომელიც პერსონალურ მონაცემთა დაცვის ინსპექტორის ბაზაზე ყალიბდება და მისი უფლებამონაცვლე ხდება, 2019 წლის 1-ელ ივლისს უნდა ამოქმედდეს.
v-if="article.gallery" v-html="article.gallery"
