კრიტიკული მედიის არსებობა, თავისუფალი მედია და ჟურნალისტების დამოუკიდებელი საქმიანობა არის ის ღირებულებები და სტანდარტი, რომელიც ჩვენმა ხელისუფლებამ უზრუნველყო, - ასე ეხმაურება უმრავლესობის ლიდერი არჩილ თალაკვაძე „რუსთავი 2“-ის ირგვლივ განვითარებულ მოვლენებს.

მისი თქმით, გვარამიას მხრიდან ერთგვარი პრაქტიკაა მსგავსი განცხადებების კეთება.

„ვფიქრობ, ეს შესაძლოა, უკვე არის ერთგვარი პრაქტიკა გვარამიას მხრიდან, რომ ის წლების განმავლობაში, რაც ხელისუფლება შეიცვალა, ამბობს, რომ „რუსთავი 2“-ზე არის შეტევა და შესაძლოა დაიხუროს. ეს დეზინფორმაციაა. მაშინ, როცა ასეთი განცხადებები კეთდება, ვხედავთ, რომ „რუსთავი 2“ შეუფერხებლად აგრძელებს საქმიანობას და იმასაც ხედავთ, რომ როდესაც სპეკულაციები არის, რომ თითქოს არჩევნებისთვის სჭირდება ხელისუფლებას ეს პროცესები, სწორედ „რუსთავი 2“-ის მაუწყებლობის პირობებშიც, მათ შორის, ჩვენ გავიმარჯვეთ არაერთ არჩევნებში - საპარლამენტოშიც, ადგილობრივშიც და ჩვენმა მხარდაჭერილმა კანდიდატმა საპრეზიდენტოშიც. კრიტიკული მედიის არსებობა, თავისუფალი მედია და ჟურნალისტების დამოუკიდებელი საქმიანობა არის ის ღირებულებები და სტანდარტი, რომელიც ჩვენმა ხელისუფლებამ უზრუნველყო“,- განაცხადა თალაკვაძემ.

"რუსთავი 2“-ის ცნობით, სამაუწყებლო კომპანიის 9%-ის მფლობელი ნინო ნიჟარაძე დაგროვილი გადასახადების სახით კომპენსაციას ითხოვს. საუბარია ჯამში, დაახლოებით, 26 მილიონ ლარზე. ნინო ნიჟარაძე არხის ყოფილი დირექტორის, გოგი გეგეშიძის მეუღლეა და მისი გარდაცვალების შემდეგ მიიღო კომპანიის წილი.

იხილეთ ვიდეო