აშშ-ის მიერ ირანისთვის დამატებითი სანქციების დაწესება ნათლად მიუთითებს, რომ ვაშინგტონის წინადადება მოლაპარაკებების დაწყების შესახებ გულწრფელი არ ყოფილა, - ამის შესახებ ირანის საგარეო საქმეთა სამინისტროს ოფიციალურმა წარმომადგენელმა აბას მუსავიმ განაცხადა. აღნიშნულ ინფორმაციას „როიტერი“ ავრცელებს. მისივე თქმით, სულ ერთი კვირის მოცდა გახდა საკმარისი, რომ აშშ-ის წინადადება მოლაპარაკებების თაობაზე უსარგებლო გამხდარიყო.
აშშ-მ პარასკევს სანქციები დაუწესა მსხვილ ირანულ ნავთობქიმიურ ჰოლდინგს, „ისლამური რევოლუციის გუშაგთა კორპუსის“ (ირანის ისლამური რესპუბლიკის სპეცსამსახურების გაერთიანება) არაპირდაპირი ფინანსური მხარდაჭერისათვის. აშშ ირანთან ბირთვული ენერგიის თაობაზე 2015 წელს დადებული მრავალმხრივი შეთანხმებიდან შარშან გამოვიდა და მას შემდეგ ორ სახელმწიფოს შორის ურთიერთობა სულ უფრო მწვავდება. მაისში აშშ-მ მნიშვნელოვნად გაზარდა თავისი სამხედრო გემებისა და ბომბდამშენი თვითმფრინავების რაოდენობა სპარსეთის ყურეში. დონალდ ტრამპმა ბოლო ორი კვირის განმავლობაში რამდენჯერმე გამოთქვა ირანთან მოლაპარაკების დაწყების სურვილი, მათ შორის წინასწარი პირობების გარეშე, თუმცა ირანს ამ მოლაპარაკებების დაწყების სურვილი არც აქამდე გამოუხატავს.