„ემისიის პროსპექტის“ აპლიკაცია არ მიგვიღია. გვქონდა ანაკლიის კონსორცუმთან ამ თემაზე შეხვედრა, მაგრამ მას შემდეგ მათგან კომუნიკაცია აღარ შემდგარა, - ამის შესახებ ეროვნული ბანკის პრეზიდენტმა კობა გვენეტაძემ, ანაკლიის კონსორციუმის მიერ აქციების შესაძლო ემისიასთან დაკავშირებით განაცხადა.

„ემისიის პროსპექტის აპლიკაცია ჩვენ არ მიგვიღია. ჩვენ მივიღეთ წერილი, სადაც იყო დაფიქსირებული, რომ ანაკლიის კონსორციუმს აქვს სურვილი კორპორაციული ფასიანი ქაღალდები გამოუშვან. ჩვენ მათ მაშინვე ვუპასუხეთ და შევთავაზეთ შეხვედრა. ეს შეხვედრა შედგა, მათ კითხვები დასვეს, ჩვენ ვუპასუხეთ. ამის შემდეგ არანაირი კომუნიკაცია კონსორციუმის მხრიდან არ ყოფილა. თუ იქნება აპლიკაცია პროსპექტზე, ჩვენ ამას განვიხილავთ ისევე, როგორც ყველა სხვა შემთხვევაში“,- განაცხადა გვენეტაძემ.

პარლამენტის საფინანსო-საბიუჯეტო კომიტეტის სხდომაზე დღეს კობა გვენეტაძეს უსმენენ. მას ანაკლიის შესახებ კითხვა ოპოზიციონერმა დეპუტატმა რომან გოცირიძემ დაუსვა.

შეგახსენებთ, „ანაკლიის განვითარების კონსორციუმმა“ ეროვნულ ბანკს აქციების ემისიის შესახებ აპრილში მიმართა.