ფრაქცია „ნაციონალური მოძრაობის“ თავმჯდომარე რომან გოცირიძე მმართველ გუნდს მიმართავს, ნუ ახდენს ოპოზიციის მიერ ინიცირებული საკანონმდებლო ინიციატივების იგნორირებას და ნუ ანიჭებს პრიორიტეტს მხოლოდ უმრავლესობისა და მთავრობის კანონპროექტებს.
შესაბამისი მოწოდება გოცირიძემ ბიუროს სხდომაზე გააკეთა. მან კოლეგებს შეახსენა, რომ გასულ სასესიო კვირას ორი პლენარული სხდომა არ ჩატარდა და მიზეზად ის გარემოება დასახელდა, რომ პლენარული სხდომის დღის წესრიგით გათვალისწინებული საკითხები ამოწურული იყო.
„ამ დროს დღის წესრიგში ფრაქცია „ნაციონალური მოძრაობის“ 5 კანონპროექტი და ოპოზიციის 15 კანონპროექტია შესული, რომელიც პარლამენტმა არ განიხილა. მიდგომა არის ასეთი, რომ ოპოზიციის კანონპროექტები სათვალავში არ შედის“, - განაცხადა რომან გოცირიძემ ბიუროს სხდომაზე.
გოცირიძის უკმაყოფილებას საპროცედურო საკითხთა და წესების კომიტეტის თავმჯდომარე გიორგი კახიანი გამოეხმაურა.
კახიანმა აღნიშნა, რომ პროექტების განხილვის გადადება თავად ოპოზიციის თხოვნით ხდება, თუმცა მისი არგუმენტი რომან გოცირიძემ არ გაიზიარა და განაცხადა, რომ ასეთ მხოლოდ ერთ შემთხვევას ჰქონდა ადგილი.