აშშ-ს პრეზიდენტის დონალდ ტრამპის ადმინისტრაცია 2020 წლის მოსახლეობის აღწერისას ანკეტაში მოქალაქეობის შესახებ კითხვის ჩასმას ცდილობს. ამის მისაღწევად, თეთრი სახლის იურისტებმა სასამართლოს საკმარისი არგუმენტები ვერ წარუდგინეს. სასამართლოს მიერ დათქმული ვადა არგუმენტების წარდგენისთვის გუშინ ამოიწურა. თუმცა, ტრამპი უკან არ იხევს და ამ კითხვის ჩასმას ანკეტაში მაინც აპირებს.
როგორც პრეზიდენტმა ჟურნალისტებს განუცხადა, „მათ ამის გასაკეთებლად ოთხი თუ ხუთი საშუალება აქვთ, თუმცა ტრამპს დეტალები არ დაუზუსტებია.
მოსახლეობის აღწერა აშშ-ში 10 წელიწადში ერთხელ ტარდება. კითხვა მოქალაქეობის შესახებ ანკეტაში 1950 წლის შემდეგ არ ყოფილა. თუმცა 1970 წლიდან 2000 წლამდე ეს კითხვა ანკეტაში მოსახლეობის გარკვეულ ჯგუფებთან დამატებით ფიგურირებდა. „ბიბისის“ ინფორმაციით, ამ კითხვაზე პასუხს სერიოზული ეკონომიკური და პოლიტიკური შედეგები შეიძლება მოჰყვეს. დღეს აშშ-ში მილიარდობით დოლარი ქალაქებზე და შტატებზე ნაწილდება რეალური მოსახლეობის თანახმად და არა აშშ-ის მოქალაქეობის მქონე მოსახლეობის რაოდენობის მიხედვით. ამავე პრინციპით ხდება ადგილების გასაზღვრა კონგრესში.
