პარლამენტის დამოუკიდებელი დეპუტატის, ეკა ბესელიას განცხადებით, 2020 წლის ბიუჯეტის პროექტი, არჩევნების ინტერესებსაა მორგებული. დოკუმენტის განხილვას პარლამენტი დღეს იწყებს.

როგორც ჟურნალისტებს დეპუტატმა განუცხადა, ბიუჯეტის პროექტს აქვს ხარვეზები და პრიორიტეტები სხვაგვარადაა დასალაგებელი.

„საინტერესო იქნება ის პრიორიტეტული მიმართულებები, რომლებიც საჭიროებს მეტ მხარდაჭერას. ეს არის ადამიანის უფლებების კუთხით გაძლიერება, დამოუკიდებელი საგამოძიებო მექანიზმის, დამოუკიდებელი ინსტიტუტების საქმიანობის გაძლიერება, რომელთაც ყოველ წელს ჰქონდათ პრობლემა. რეალურად, პრიორიტეტები არის კიდევ უფრო სხვაგვარად დასალაგებელი იგივე სკოლამდელი განათლების კუთხით, სადაც არ არსებობს საკმარისი რესურსი, რომ ეს რეფორმა დროულად განხორციელდეს. განათლებას ყველა პრემიერი აცხადებს პრიორიტეტულად, მაგრამ ამ მხრივ პირველ საფეხურში არ იდება ფინანსური რესურსი“, - აღნიშნა ბესელიამ.