რუსთავი-თბილისის ავტომაგისტრალის მიმდებარე ტერიტორიაზე, სოკოს საწარმო „თეთრ ქუდთან" რუსთავის მოსახლეობა საპროტესტო აქციას მართავს. აქციის მონაწილეების განცხადებით, რამდენიმე თვეა პერიოდულად, ქალაქში უსიამოვნო სუნია, რაც, მათი თქმით, სწორედ სოკოს საწარმოდან ვრცელდება.

საწარმოსთან გარემოს ეროვნული სააგენტოს, სურსათის უვნებლობის სამსახურის წარმომადგენლები და სამოქალაქო აქტივისტებიც იმყოფებიან. ამ დროისთვის საწარმოს ადმინისტრაციასა და შესაბამისი უწყებების წარმომადგენლებს შორის შეხვედრა მიმდინარეობს.

საწარმოსთან მიმდინარე აქციის გამო, გარკვეული დროის განმავლობაში სამუშაო პროცესი შეწყვეტილი იყო. „თეთრ ქუდში" დასაქმებულები აქციის მონაწილეებს დაუპირისპირდნენ და პროტესტის შეწყვეტისკენ მოუწოდეს. მათი განცხადებით, თუ შესაბამისი უწყებები საწარმოს, შემოწმების შემდეგ გააჩერებენ, ისინი სამსახურის გარეშე დარჩებიან.