ბრიტანეთის პრემიერ-მინისტრმა ბორის ჯონსონმა ბრიუსელს „ბრექსითის“ გადავადების თხოვნით წერილი გადაუგზავნა, თუმცა ხელმოწერის გარეშე, - ამის შესახებ ინფორმაციას „ბიბისი“ ავრცელებს.

გამოცემის ცნობით, თხოვნას თან ერთვოდა მეორე, ჯონსონის მიერ ხელმოწერილი წერილი, სადაც ნათქვამია, რომ „ბრექსითის“ გადადება დიდი შეცდომა იქნება.

„გადადება დააზიანებს ბრიტანეთისა და ჩვენი ევროკავშირელი პარტნიორების ინტერესებს, ასევე ჩვენს შორის არსებულ ურთიერთობებს", - წერს ჯონსონი ხელმოწერილ წერილში.

შეგახსენებთ, რომ გუშინ ბრიტანეთის თემთა პალატამ „ბრექსითის“ გადავადებას დაუჭირა მხარი. დეპუტატ ოლივერ ლეტვინის მიერ შეტანილი ცვლილების სასარგებლოდ ხმა 322-მა დეპუტატმა მისცა, წინააღმდეგი კი 306 იყო.

ბორის ჯონსონს კანონი ავალდებულებდა, რომ ევროკავშირისთვის გადავადების შესახებ თხოვნა შაბათს, ბრიტანეთის დროით 23:00 საათამდე გადაეგზავნა.

კენჭისყრის შედეგების მიუხედავად ბორის ჯონსონი აცხადებდა, რომ ის ამ საკითხზე ევროკავშირთან მოლაპარაკებებს არ გამართავდა.

„გადავადების საკითხს ევროკავშირთან არ განვიხილავ და ამის გაკეთებას ვერც კანონი მაიძულებს", - განუცხადა ბორის ჯონსონმა პარლამენტის წევრებს.

ევროპის საბჭოს პრეზიდენტი დონალდ ტუსკი სოციალურ ქსელ „ტვიტერში“ წერს, რომ მან „ბრექსითის“ გადავადებაზე თხოვნა მიიღო. მისი თქმით, იმაზე, თუ რა რეაგირებას მოახდენენ წერილზე, ევროკავშირის ლიდერებთან იმსჯელებს.