ჩვენ დარწმუნებული ვართ ჩვენს გამარჯვებაში და კიდევ ერთხელ გავიმეორებ, რომ სამართლიანობა არ აღდგება იქამდე, ვიდრე „რუსთავი 2“ არ დაუბრუნდება თავის დამფუძნებლებს, - ამის შესახებ სამაუწყებლო კომპანია „რუსთავი 2“-ის დამფუძნებელმა ჯარჯი აქიმიძემ „ინტერპრესნიუსს“ განუცხადა, რითაც გამოეხმაურა სასამართლოს მიერ ტელევიზიის 60% წილზე ყადაღის დადებას.
ჯარჯი აქიმიძის თქმით, ყველაზე მთავარი ის არის, რომ თბილისის საქალაქო სასამართლომ მისი და დავით დვალის სარჩელი წარმოებაში მიიღო. აქიმიძე იმედოვნებს, რომ სასამართლო პროცესები მაქსიმალურად ობიექტურად გაშუქდება.
„კარგია, რომ სასამართლომ სარჩელი წარმოებაში მიიღო. ეს ნიშნავს იმას, რომ დაიწყება სასამართლო პროცესი. როგორ განვითარდება მოვლენები და ეს ყველაფერი როგორ მოხდება, ამას იმედია, ყველა ერთად ვიხილავთ. რაც შეეხება 60%-ს, ჩვენ ვითხოვდით, ჩვენს კუთვნილ 6 0%-ზე ყადაღის დადებას და კარგია, როდესაც სასამართლომ ეს გაითვალისწინა. ეს ნიშნავს იმას, რომ დავის დასრულებამდე დღევანდელ მეპატრონეს არ შეეძლება გაასხვისოს წილების 60-%“, - განაცხადა ჯარჯი აქიმიძემ.
თბილისის საქალაქო სასამართლომ „რუსთავი 2“-ის საქმეზე ჯარჯი აქიმიძისა და დავით დვალის სარჩელი წარმოებაში მიიღო და ტელეკომპანია „რუსთავი 2“ -ის 60 %-ს ყადაღა დაადო. ტელეკომპანია „რუსთავი 2“-ის 60%-იანი წილის დაბრუნების მოთხოვნით, დავით დვალმა, ჯარჯი აქიმიძემ და მათი ინტერესების დამცველმა კახა კოჟორიძემ თბილისის საქალაქო სასამართლოში სარჩელი 17 ოქტომბერს შეიტანეს.