კასპში 7 თვის ჩვილის მკვლელობაში მსჯავრდებული არასრულწლოვნის მეუღლე მიხეილ დვალიშვილი გამოკითხვაზე დაიბარეს.

როგორც „ინტერპრესნიუსს“ დვალიშვილის ადვოკატმა ირაკლი ჩომახაშვილმა განუცხადა, ის მისი დაცვის ქვეშ მყოფთან ერთად, ამ წუთებში გორის პოლიციაში იმყოფება.

დვალიშვილს სავარაუდოდ, არასრულწლოვანთან ქორწინებას ედავებიან.

ცნობისთვის, შვილის მკვლელობაში მსჯავრდებულ არასრულწლოვანს გორის რაიონულმა სასამართლომ სასჯელის სახედ და ზომად 8 წლით თავისუფლების აღკვეთა განუსაზღვრა, რაც არასრულწლოვანთა მართლმსაჯულების კოდექსის 73-ე მუხლის მე-3 ნაწილის შესაბამისად 1/4-ით შეუმცირდა და საბოლოოდ 6 წლით თავისუფლების აღკვეთა განესაზღვრა.

სამართალდამცავებმა კასპის მუნიციპალიტეტის სოფელ აღაიანში, 7 თვის ბავშვის მკვლელობის ბრალდებით ჩვილის არასრულწლოვანი, 16 წლის დედა 21 მაისს დააკავეს.