პროფესიულ პროგრამებზე სწავლის გაგრძელების მსურველებისათვის ტესტირება 40 საგამოცდო ცენტრში მიმდინარეობს. ამის შესახებ „ინტერპრესნიუსს“ განათლების, მეცნიერების, კულტურისა და სპორტის სამინისტროდან აცნობეს.

მათივე ინფორმაციით, პროფესიული პროგრამებისთვის ტესტირება 09:00 საათიდან დაიწყო. პროცესს განათლების, მეცნიერების, კულტურისა და სპორტის მინისტრის მოადგილე გიორგი ვაშაკიძე და შეფასებისა და გამოცდების ეროვნული ცენტრის დირექტორი სოფიო გორგოძე დააკვირდნენ.

„პროფესიულ პროგრამებზე ტესტირება საქართველოს მასშტაბით გახსნილ ყველა საგამოცდო ცენტრში მშვიდ ვითარებაში მიმდინარეობს. 2019 წლის მიღებაზე ყველაზე მოთხოვნადი პროფესიებია: საინფორმაციო ტექნოლოგიები, კულინარია, ბუღალტრული აღრიცხვა და სხვა. წელს მიღება 48 სახელმწიფო და კერძო უმაღლეს სასწავლებელს 300-ზე მეტ პროფესიულ პროგრამაზე აქვს გამოცხადებული. პროფესიული ტესტირება კომპიუტერულად ტარდება. ტესტი პროფესიული უნარებისა და საგნის/საგანთა ჯგუფის ნაწილებისაგან შედგება. დაფინანსების მოსაპოვებლად მონაწილემ ორივე ტესტის მაქსიმალური ჯამური ქულის (100 ქულა) 25%-ზე მეტი უნდა დააგროვოს. შეფასებას აპლიკანტი ტესტირების დასრულებისთანავე დაინახავს ეკრანზე, ხოლო ინფორმაცია ჩარიცხვის შესახებ გამოქვეყნდება შეფასებისა და გამოცდების ეროვნული ცენტრის ვებგვერდზე ნოემბრის შუა რიცხვებში. სწავლის დაწყებასთან დაკავშირებით კი გადაწყვეტილებას პროფესიული სასწავლებლები თავად მიიღებენ",- ნათქვამია ინფორმაციაში.