გერმანიის აღმოსავლეთ ნაწილში მდებარე თიურინგიას მხარეში ჩატარებულ რეგიონალურ არჩევნებში ულტრამემარჯვენე პარტიამ „ალტერნატივა გერმანიისთვის“ შედეგებით ანგელა მერკელის „ქრისტიანულ-დემოკრატიულ“ პარტიას“ გაუსწრო, - ამის შესახებ ინფორმაციას „დოიჩე ველე“ ავრცელებს.

გამოცემის ცნობით, წინასწარი მონაცემების თანახმად, არჩევნებში ლიდერობას კვლავ „მემარცხენე“ პარტია ინარჩუნებს, რომელმაც ხმების 31% მოიპოვა.

მეორე ადგილზეა პარტია „ალტერნატივა გერმანიისთვის“, რომელმაც არჩევნებში ხმების 23.4 პროცენტი დააგროვა, „ქრისტიანულ-დემოკრატიული“ პარტია კი - 21.8 პროცენტით მესამე ადგილს იკავებს.

აღსანიშნავია, რომ არჩევნებში ამომრჩეველთა რეკორდულად მაღალი მაჩვენებელი - 65% დაფიქსირდა. ანგელა მერკელის პარტიის რეიტინგი კი 2014 წელთან შედარებით 14 პოროცენტითაა შემცირებული.