პარლამენტის თავმჯდომარის, არჩილ თალაკვაძის განმარტებით, ანა დოლიძესთან დაკავშირებით გადაწყვეტილება პრეზიდენტმა უნდა მიიღოს და მასში საქართველოს პარლამენტი ვერანაირად ვერ ჩაერევა. როგორც თალაკვაძემ აღნიშნა, იუსტიციის უმაღლეს საბჭოში არამოსამართლე წევრის განწესებისა თუ საბჭოდან გამოთხოვის როგორც სამართლებრივი, ისე პოლიტიკური გადაწყვეტილება პრეზიდენტს აქვს მისაღები.

„ამ საკითხის სამართლებრივი თუ პოლიტიკური შეფასება პრეზიდენტის კომპეტენციაა. პარლამენტი ვერ ჩაერევა ამ გადაწყვეტილებაში ვერანაირი ფორმით, ეს გადაწყვეტილება უნდა მიიღოს საქართველოს პრეზიდენტმა", - განაცხადა თალაკვაძემ.

მან ასევე აღნიშნა, რომ იუსტიციის უმაღლესი საბჭოს საქმიანობა კანონითაა დარეგულირებული.

„ანა დოლიძე საკმაოდ ძლიერი ოპონენტია სახელისუფლებო პარტიის. ჩვენ გვყავს ძლიერი სამოქალაქო საზოგადოება, პოლიტიკური სპექტრი, თავისუფალი მედია და ეს ყველაფერი რასაც თქვენ ადევნებთ თვალს, მნიშვნელოვანი ნაწილია დემოკრატიის", - განაცხადა პარლამენტის თავმჯდომარემ.

შეგახსენებთ, რომ იუსტიციის უმაღლესი საბჭო საქართველოს პრეზიდენტ სალომე ზურაბიშვილს მიმართავს, საბჭოს არამოსამართლე წევრ ანა დოლიძეს უფლებამოსილება შეუწყვიტოს.