„საერთაშორისო გამჭვირვალობა - საქართველოს" აღმასრულებელი დირექტორის, ეკა გიგაურის განცხადებით, მეუფე იაკობის განცხადებებზე გამოძიება უნდა დაიწყოს. როგორც გიგაური აღნიშნავს, საზოგადოება საპატრიარქოში მიმდინარე პროცესებით დაზაფრულია.
„ჩვენი ორგანიზაცია რელიგიურ საკითხებზე არ მუშაობს, ამიტომ სიღრმისეული ცოდნა ამასთან დაკავშირებით არ გვაქვს. ერთადერთი, რისი თქმაც შეიძლება არის ის, რომ რაზეც მეუფე იაკობმა ილაპარაკა, რა თქმა უნდა, ამაზე უნდა დაიწყოს გამოძიება. მნიშვნელოვანია საზოგადოებას ჰქონდეს ამ ყველაფერზე პასუხები. ცხადია, რომ რაც საპატრიარქოში ხდება, არის ძალიან სამწუხარო. ცხადია, ეს გავლენას ახდენს საზოგადოებაზე. საზოგადოება არის დაზაფრული და ეს არის ფაქტი. ყველაფერი, რაც ხელს უწყობს საზოგადოებას კიდევ უფრო დაიყოს და ერთმანეთს დაუპირისპირდეს, ეს ქვეყნისთვის არის ძალიან ცუდი",- განაცხადა გიგაურმა.
ამასთან, მედიის წარმომადგენლები დაინტერესდნენ, რამდენად გაზრდის რუსულ გავლენების ქუთათელ-გაენათელ მიტროპოლიტად მეუფე იოანეს დანიშვნა, გიგაურმა განაცხადა, რომ ისეთ თანამდებობებზე, რომელმაც შესაძლოა, გავლენა მოახდინოს საზოგადოების აზრის ფორმირებაზე, უნდა იყვნენ ადამიანები, რომლებიც იმოქმედებენ ქვეყნის ინტერესებიდან გამომდინარე.
„მგონია, რომ ისეთ თანამდებობებზე, რომელმაც შეიძლება გავლენა მოახდინოს ადამიანების აზრის ფორმირებაზე, იყვნენ ისეთი ადამიანები, რომლებიც დარწმუნებულები არიან, რომ რუსეთი ოკუპანტია და არის ჩვენი ქვეყნის მტერი. ეს არის ფაქტი, ჩვენი ქვეყნის რეალობა და დანარჩენზე ლაპარაკი არასწორია და არ არის სახელმწიფო ინტერესების შესაბამისი",- განაცხადა გიგაურმა.
შეგახსენებთ, ბოდბელმა მთავარეპისკოპოსმა, მეუფე იაკობმა რამდენიმე დღის წინ განაცხადა, რომ გიორგი კვირიკაშვილი, გიორგი გახარია და ვახტანგ გომელაური მას პატრიარქის გადაყენებაში დახმარებას სთხოვდნენ. გარდა ამისა, ბოდბელმა მთავარეპისკოპოსმა განაცხადა, რომ ყოფილი მთავარი პროკურორი, ოთარ ფარცხალაძე და ბიზნესმენი, უჩა მამაცაშვილი რეგიონული განვითარებისა და ინფრასტრუქტურის ყოფილ მინისტრს, რამაზ ნიკოლაიშვილს ხელშეუხებლობისთვის 15 მლნ დოლარს სთხოვდნენ.