ბატონო აკაკი, მართლა არ ვაპირებდი გამოსვლას, მაგრამ ისეთ საოცრებებს ლაპარაკობთ მუზად გამოადგებით ადამიანს. რა შიშზე ლაპარაკობთ, ვის ეშინია თქვენი? - ასე მიმართა ფრაქცია „ქართული ოცნების“ თავმჯდომარე მამუკა მდინარაძემ „ევროპული საქართველოს“ წევრს, აკაკი ბობოხიძეს და ოპოზიციის სხვა წარმომადგენლებს პარლამენტის პლენარულ სხდომაზე, სადაც საარჩევნო ცვლილებებს განიხილავენ.

მან ოპოზიციას საკონსტიტუციო სასამართლოს გადაწყვეტილების წაკითხვა ურჩია.

„პარტიებზე რომ ლაპარაკობდნენ ჩემი კოლეგები უმრავლესობიდან, იმას კი არ ლაპარაკობდნენ, რომ ვინ როგორ აზის ხალხს წურბელად, თორემ თქვენ მოგიხსენიებდნენ პირველ რიგში. იმას ლაპარაკობდნენ, რომ არსებობს 10-11 პარტია, რომელსაც აქვს საერთო ჯამში დაახლოებით 10 მილიონი დაფინანსება და ბოლო არჩევნებში მათი საერთო ჯამური შედეგი იყო 1%.

რაც შეეხება თანაბრად თუ არათანაბრად განაწილებას, ეს როგორ გაფიქრდებათ, ან კონსულტაციებს არ გადიხართ ერთმანეთთან, ან იურისტები არ გყავთ გვერდით, ან საკონსტიტუციოს გადაწყვეტილებებს არ კითხულობთ?

ამბობთ, შიში გაქვთ „ნაციონალური მოძრაობისო“. ამ ხალხს ვინც აქ გამოდიოდა, მათ შორის, ობიექტურობისთვის უნდა ვთქვა, არა მხოლო უმრავლესობიდან, შიში არ ჰქონია მაშინ, როცა შიშის ზარს სცემდით ქვეყანას თქვენი ჭკუით. დღეს რა შიშზე ლაპარაკობთ, ვის რა ეშინია თქვენი და რისი გამკეთებლები ხართ? დღეს ერთადერთი ბერკეტი გაქვთ საბედნიეროდ - ტყუილი და თუ საინფორმაციო საშუალებას ფლობთ, ატყუებთ ხალხს. რა შიშზე ლაპარაკობთ, ვის ეშინია თქვენი? ამიტომ, ცოტა დაწყნარდით და საკონსტიტუციოს გადაწყვეტილებები წაიკითხეთ და ასეთ საოცრებებს ნუ ლაპარაკობთ, რბილად რომ ვთქვათ,“- განაცხადა მამუკა მდინარაძემ.

მანამდე აკაკი ბობოხიძემ აღნიშნა, რომ ხელისუფლებას „ნაციონალური მოძრაობის“ შიში აქვს და ამიტომ არ სურს ბლოკების დაშვება.