ეკა გიგაური - ყველაფერს გავაკეთებთ, რათა მსოფლიოს გავაგებინოთ, რომ „ქართული ოცნება“ და ივანიშვილი ძალაუფლების შენარჩუნებისთვის ყველაფერს აკეთებენ
მოვუწოდებთ მმართველ პარტიას და ბიძინა ივანიშვილს, რომ შეწყვიტოს სახელმწიფო ინსტიტუტების სათავისოდ გამოყენება. ეს არის აბსოლუტურად მიუღებელი და გავლენას ახდენს ქვეყანაში დემოკრატიის ხარისხზე, - ამის შესახებ „საერთაშორისო გამჭვირვალობა - საქართველოს“ აღმასრულებელმა დირექტორმა, ეკა გიგაურმა არასამთავრობო ორგანიზაციების წარმომადგენლებთან ერთად გამართულ პრესკონფერენციაზე განაცხადა.
როგორც გიგაურმა 18 ნოემბერს დაკავებული დემონსტრანტების საქმეების სასამართლოში მიმდინარეობის შეფასებისას აღნიშნა, მოსამართლე ვალერიან ფილიშვილი „არ იყო თავის გადაწყვეტილების მიღებაში თავისუფალი და როგორც ჩანს, ინსტრუქციებს იღებდა“.
ამასთან, გიგაურის განცხადებით, არასამთავრობო ორგანიზაციები სასამართლო პროცესში აღმოჩენილი დარღვევების შესახებ საერთაშორისო საზოგადოებას აცნობებენ.
„საერთო ჯამში, ეს პროცესი თავიდან ბოლომდე პოლიტიზირებული იყო. როგორც ჩანს, მოსამართლე არ იყო თავის გადაწყვეტილების მიღებაში თავისუფალი, ზოგ შემთხვევაში ის გადიოდა სასამართლოს პროცესიდან და როგორც ჩანს, იღებდა ინსტრუქციებს და ეს აშკარად ჩანდა. ჩვენ მოვუწოდებთ მმართველ პარტიას და ბიძინა ივანიშვილს, რომ შეწყვიტოს სახელმწიფო ინსტიტუტების სათავისოდ გამოყენება, ეს არის აბსოლუტურად მიუღებელი და გავლენას ახდენს ქვეყანაში დემოკრატიის ხარისხზე. გავაგრძელებთ დაკავებულების დაცვას და გავასაჩივრებთ მიღებულ გადაწყვეტილებებს. რა თქა უნდა, დავაკვირდებით პროცესს და ასევე მივაწოდებთ ინფორმაციას ყველა საერთაშორისო ორგანიზაციას და ჩვენი მეგობარი ქვეყნების წარმომადგენლობებს. გავაკეთებთ ყველაფერს იმისთვის, რომ მთელ ქვეყანას, მთელ მსოფლიოს გავაგებინოთ, რომ „ქართული ოცნება“ და ბიძინა ივანიშვილი ყველაფერს აკეთებენ ძალაუფლების შენარჩუნებისთვის და ამისთვის კონკრეტულ ინსტიტუციებს და ადამიანებს იყენებენ“, - განაცხადა ეკა გიგაურმა.
