ისრაელის პრემიერ-მინისტრის ბენიამინ ნეთანიაჰუს პარტია „ლიკუდი“ ახალი ლიდერის გამოსავლენად პრაიმერის ჩატარებას გეგმავს, - ამის შესახებ ინფორმაციას „როიტერსი“ ავრცელებს.

სააგენტოს ცნობით, პარტიამ აღნიშნული გადაწყვეტილება მას შემდეგ მიიღო, რაც ბენიამინ ნეთანიაჰუს ბრალი კორუფციისა და თაღლითობის მუხლებით წაუყენეს.

ისრაელის მედია იუწყება, რომ „ლიკუდი“ პრაიმერს 6 კვირაში ჩაატარებს.

ისრაელში შესაძლოა არჩევნები წელს მესამედ ჩატარდეს, ვინაიდან კოალიციური მთავრობის ფორმირება ვერც ნეთანიაჰუმ და ვერც მისმა მეტოქე ბენი განცმა შეძლო. ისრაელის პრეზიდენტმა პარლამენტს საკუთარი კანდიდატურის წარსადგენად 3 კვირიანი ვადა მისცა, იმ შემთხვევაში, თუ პარლამენტის საერთო კანდიდატურის წარდგენაზე ვერ შეთანხმდება, ისრაელში საპარლამენტო არჩევნები დაინიშნება.