„ახალი საქართველოს“ სოციალური სამსახურის ხელმძღვანელი, ბაგა-ბაღებში ბავშვთა კვების დარღვევებზე საუბრობს. ამის შესახებ „ინტერპრესნიუსს“ „ახალი საქართველოდან“ აცნობეს. როგორც თეონა ჭალიძე აღნიშნავს, 2019 წლის თებერვალში მათ მიერ გასაჯაროვდა ფაქტი იმის თაობაზე, რომ სამტრედიის სკოლამდელი აღზრდის დაწესებულებებში, კომპანია შპს „ელენიკოს“ მიერ დაფიქსირდა საქონლის ხორცის ნაცვლად ცხენის ხორცის მიწოდება.

,,ახალი საქართველოს“ სოციალური სამსახურის მიერ 2019 წლის თებერვალში გასაჯაროვდა დოკუმენტი იმის თაობაზე, რომ სამტრედიის საბავშვო ბაღებში დაფიქსირდა ცხენის ხორცის გამოყენება, კერძოდ მომმარაგებელ კომპანიას შპს ,,ელენიკოს” საქონლის ხორცის ნაცვლად ბაღებში შეჰქონდა ცხენის ხორცი. სწორედ აღნიშნული დოკუმენტის გასაჯაროების შემდეგ დაიწყო გამოძიება და რამდენიმე დღის წინ ქუთაისის საქალაქო სასამართლომ ყალბი დოკუმენტების დამზადებისა და გამოყენების გზით ბაგა-ბაღებისთვის ძროხის ხორცის ნაცვლად ცხენის ხორცის მიწოდებაში ბრალდებული ნ.მ. დამნაშავედ სცნო, სასჯელის სახით კი 3 წლითა და 6 თვით თავისუფლების აღკვეთა განუსაზღვრა. იმედი მაქვს, ეს იქნება სამაგალითო სხვა ბიზნესოპერატორებისთვის და ვერავინ გაბედავს ბავშვების ხარჯზე ეკონომიის გაკეთებას. ,,ახალი საქართველოს“ სოციალური სამსახური აგრძელებს მონიტორინგს საბავშვო ბაგა-ბაღებში არსებული დარღვევების გამოსავლენად. საეჭვო ფაქტების შესახებ გთხოვთ დაგვიკავშირდით “,- განაცხადა თეონა ჭალიძემ.

შეგახსენებთ, რომ სამართალდამცველებმა ნ.მ. 2019 წლის 27 თებერვალს დააკავეს. მას ბრალი საქართველოს სისხლის სამართლის კოდექსის 210-ე მუხლის პირველი ნაწილით, 219-ე მუხლის პირველი ნაწილით, 362-ე მუხლის პირველი ნაწილითა და 362-ე მუხლის მე-2 ნაწილის „ბ“ ქვეპუნქტით წარედგინა და აღკვეთის ღონისძიების სახით პატიმრობა 3 წლითა და 6 თვის ვადით შეეფარდა.