ისრაელის პრემიერ-მინისტრმა ბენიამინ ნეთანიაჰუმ რამდენიმე ევროპული ქვეყანა მკაცრად გააკრიტიკა. მისი თქმით, ბელგია, დანია, ფინეთი, ჰოლანდია, ნორვეგია და შვედეთი ცდილობენ გვერდი აუარონ აშშ-ს მიერ ირანის წინააღმდეგ დაწესებულ სანქციებს, რითაც „აქეზებენ ირანის რეჟიმს განახორციელოს რეპრესიები თავისი მოქალაქეების წინააღმდეგ“.
„მაშინ, როდესაც ირანის რეჟიმი კლავს საკუთარ ხალხს, ევროპის ქვეყნები ამ მკვლელ რეჟიმს მხარს უჭერენ. მათ უნდა რცხვენოდეთ საკუთარი საქციელის. ისინი საშუალებას აძლევენ ფანატიკოს ტერორისტებს განავითარონ ატომური იარაღი და ბალისტიკური რაკეტები. ამით ისინი უბედრებას მოუტანენ არა მარტო თავიანთ ქვეყნებს, არამედ ყველა ჩვენგანს“,-განაცხადა ნეთანიაჰუმ.
ისრაელი მხარს უჭერს ტრამპის ადმინისტრაციის „მაქსიმალური ზეწოლის“ პოლიტიკას ირანის ისლამურ სახელმწიფოსთან მიმართებაში. აშშ-სა და ირანს შორის ურთიერთობები გასულ წელს გაუარესდა, როდესაც შეერთებული შტატები თეირანის 2015 წლის ბირთვული შეთანხმებიდან გავიდა და ირანს სანქციები ხელახლა დაუწესა.