ახალგორში დაშავებული 67 წლის თამარ გიგაური კვლავ ოკუპირებული დაბის საავადმყოფოში რჩება. დაშავებული პედაგოგის ახლობლების არაერთგზის თხოვნის მიუხედავად, დე ფაქტო რეჟიმის წარმომადგენლებმა გიგაურს საქართველოს ცენტრალური ხელისუფლების მიერ კონტროლირებად ტერიტორიაზე მკურნალობის საშუალება არ მისცეს.

თამარ გიგაური, რომელმაც ტრავმა 3 ნოემბერს, რამდენიმე მეტრი სიღრმის ორმოში ჩავარდნისას მიიღო, ჯერ ახალგორის საავადმყოფოში იყო მოთავსებული, შემდეგ კი ცხინვალში გადაიყვანეს, თუმცა, ერთთვიანი მკურნალობის მიუხედავად, დაშავებულის ჯანმრთელობის მდგომარეობა არ გაუმჯობესებულა და კლინიკიდან გაწერილი პაციენტი კვალავ ახალგორის საავადმყოფოს სტაციონარში მოათავსეს.

თამარ გიგაური ,,ინტერპრესნიუსთან“ სატელეფონო საუბრისას გამოთქვამს ეჭვს, რომ შეუზღუდავად გადაადგილების და შესაბამისი სამედიცინო სერვისით სარგებლობის შესაძლებლობა არც ე.წ. გამშვები პუნქტის გახსნის შემდეგ მიეცემა.

,,ე.წ. პროპუსკები ორი თვის წინ ჩამოგვართვეს, ამის მიზეზად ,,პროპუსკების“ ვადის გასვლა დაასახელეს, ამ დოკუმენტის გარეშე კი, გამშვებ პუნქტზე არავინ გაგვატარებს. ფაქტია, რომ ჩემი ჯანმრთელობის მდგომარეობა კვლავ რთულია, ახლაც საავადმყოფოში ვწევარ. მომაწოდეს ინფორმაცია, რომ უნდა გახსნან ახალგორის გამოსასვლელში არსებული ე.წ. გამშვები პუნქტი, მაგრამ არ ვიცი, ამ ,,პროპუსკის“ გარეშე როგორ შევძლებ სამკურნალოდ გამოსვლას“, - განაცხადა თამარ გიგაურმა ,,ინტერპრესნიუსთან“ საუბრისას.