თბილისის სააპელაციო სასამართლოსთან „უფლებადამცველთა ასოციაციის " ორგანიზებით აქცია-პერფორმანსი სახელწოდებით: „არა ლობიოს სამართალს“ მიმდინარეობს. აქციის მონაწილეებმა სასამართლოსთან სიმბოლურად ლობიოს 41 მარცვალი მიიტანეს და ეზოში დააბნიეს.
ისინი ამ ფორმით რამდენიმე დღის წინ , ეროვნულ ბიბლიოთეკასთან საპროტესტო აქციის დროს დაკავებული ლაშა ჩხარტიშვილის პატიმრობას აპროტესტებენ და მხარდაჭერას უცხადებენ. მათ თან აქვთ პლაკატები წარწერით: "არა ლობიოს სამართალს", "თავისუფლება ლაშას", "როდემდე?".
„უფლებადამცველთა ასოციაციის“ თავმჯდომარის ნიკა მემანიშვილის თქმით, სააპელაციო სასამართლომ ლაშა ჩხარტიშვილის გათავისუფლების თაობაზე სარჩელი გუშინ წარმოებაში არ მიიღო და შესაბამისად, ის პოლიტიკური პატიმარია.
შეგახსენებთ, რომ ლაშა ჩხარტიშვილი 29 ნოემბერს ეროვნულ ბიბლიოთეკასთან გამართულ აქციაზე დააკავეს. მას ადმინისტრაციული სამართალდარღვევათა კოდექსის 166-ე და 173-ე მუხლების დარღვევას ედავებიან. თბილისის საქალაქო სასამართლოს გადაწყვეტილებით, ლაშა ჩხარტიშვილს რვადღიანი პატიმრობა შეეფარდა.