6 იანვარს, გაზეთ „კვირის პალიტრასთან“ ერთად, გამოვიდა „სახარება ოთხთავი“, რომლის შეძენას მკითხველი სპეციალურ ფასად შეძლებს.
როგორც „ინტერპრესნიუსს“ „პალიტრა L“-დან აცნობეს, წიგნში, რომელიც გამომცემლობა „პალიტრა L-ის“ პოპულარული პროექტის ფარგლებში გამოიცა, მათეს, მარკოზის, ლუკასა და იოანეს სახარებები შედის და შექმნილია სრულიად საქართველოს კათოლიკოს-პატრიარქის, უწმინდესისა და უნეტარესის ილია II-ის ლოცვა-კურთხევით.
მათივე ინფორმაციით, წიგნი დაბეჭდილია სპეციალურ, თერმულად დამუშავებულ ფურცლებზე, გაფორმებულია ოქროს გრავირებით და მოთავსებულია ასევე, თერმულად დამუშავებულ ტყავის ჩანთა-ყდაში, რომელიც ელვაშესაკრავით იკვრება.
„წიგნის ბოლოში მკითხველს დახვდება „ოთხთავის“ საძიებელი. ეს არ არის უბრალოდ სარჩევი: მოგეხსენებათ, სხვადასხვა „სახარებაში“ არის ერთი და იგივე ამბავი, იგავი თუ ქადაგება, რომლებიც მახარებლებმა (სახარებათა ავტორებმა) აღწერეს. მკითხველსაც ხშირად უჩნდება სურვილი, სწრაფად მოძებნოს ეს პარალელური ადგილები სხვადასხვა სახარებაში. აი, სწორედ ამაში დაეხმარება მას „ოთხთავის“ საძიებელი“, - აცხადებს წიგნის რედაქტორი თამარ მამაცაშვილი.
მათივე ცნობით, წიგნის სპეციალური ფასი 11 ლარი და 50 თეთრია, „კვირის პალიტრასთან“ ერთად კი - 13 ლარი.