არჩილ თალაკვაძე - როცა ოპოზიცია შეტევას ახორციელებს პარლამენტზე, სხდომებში არ მონაწილეობს და ქიმიურ ნივთიერებებს ასხამს, არ უნდა გვიკვირდეს კრიტიკული დამოკიდებულება საპარლამენტო პროცესის მიმართ

როდესაც ოპოზიციის ერთი ნაწილი ძალადობრივ შეტევას ახორციელებს პარლამენტზე, მეორე ნაწილი სხდომებში არ მონაწილეობს და მესამე ქიმიურ ნივთიერებებს ასხამს დარბაზში, არ უნდა გვიკვირდეს, რომ ჩვენს საზოგადოებას აქვს კრიტიკული დამოკიდებულება ასეთი საპარლამენტო პროცესის მიმართ, - ეს განცხადება პარლამენტის თავმჯდომარე არჩილ თალაკვაძემ ჟურნალისტებთან NDI-ის კვლევის შეფასებისას გააკეთა.

თუმცა, აქვე თალაკვაძე აღნიშნავს, რომ კვლევის შედეგები ხშირად არ ემთხვევა საზოგადოების განწყობებს და ის ენდობა არჩევნებს და იქ დაფიქსირებულ საზოგადოების განწყობას.

„სამწუხაროა, რომ ამ კვლევითი ორგანიზაციის შედეგები ძალიან ხშირად არ ემთხვევა საზოგადოების განწყობებს. რაც შეეხება ინსტიტუტებთან დაკავშირებულ რეიტინგებს, მე კონკრეტულად პარლამენტთან დაკავშირებით გიპასუხებთ, როდესაც ოპოზიციის ერთი ნაწილი ძალადობრივ შეტევას ახორციელებს პარლამენტზე, მეორე ნაწილი სხდომებში არ მონაწილეობს და მესამე ქიმიურ ნივთიერებებს ასხამს დარბაზში, არ უნდა გვიკვირდეს, რომ ჩვენს საზოგადოებას აქვს კრიტიკული დამოკიდებულება ასეთი საპარლამენტო პროცესის მიმართ. ასე რომ, მოვუწოდებ ჩემს კოლეგებს ოპოზიციიდან, იფიქრონ სახელმწიფო ინსტიტუტებზე, იმაზე, რომ ხელფასს იღებენ იმაში, რომ ემსახურებოდნენ საზოგადოებას და მონაწილეობდნენ კანონშემოქმედებით და ზედამხედველობის პროცესში“, - განაცხადა არჩილ თალაკვაძემ.