ხორავას ქუჩაზე დავით სარალიძის მკვლელობის საქმეზე ბრალდებულ მიხეილ კალანდიას სასამართლო პროცესზე, ლევან დადუნაშვილის მკვლელობისთვის მსჯავრდებული გუგა ბარბაქაძე დახურულ სხდომაზე იკითხება.

გუგა ბარბაქაძე ამ წუთებში, თბილისის საქალაქო სასამართლოში ჩვენებას აძლევს.

სხდომის ნაწილობრივ დახურვასთან დაკავშირებით შუამდგომლობა ბრალდების მხარემ დააყენა, რასაც დაცვის მხარე არ დაეთანხმა. სხდომის დახურვას დაეთანხმა თავად მსჯავრდებულიც.

მოსამართლე ნიკოლოზ მარსაგიშვილის განმარტებით, გუგა ბარბაქაძის მიმართ სამართალწარმოება დასრულებული არ არის, მისი საქმე დახურულად განიხილება, რის გამოც, მიზანშეუწონელია მოწმის დაკითხვა ღია სხდომაზე წარიმართოს.

გუგა ბარბაქაძე ლევან დადუნაშვილის განზრახ მკვლელობისთვისაა მსჯავრდებული და მას სასჯელის სახით თავისუფლების აღკვეთა 11 წლითა და 3 თვით აქვს შეფარდებული.