მიხეილ ჩხენკელი - სტრასბურგის უნივერსიტეტის ხელმძღვანელობა დაინტერესებულია, რომ ქუთაისის საერთაშორისო უნივერსიტეტთან და ადრონული თერაპიის ცენტრთან აქტიურად ითანამშრომლოს
საქართველოს განათლების, მეცნიერების, კულტურისა და სპორტის მინისტრმა, მიხეილ ჩხენკელმა სტრასბურგში ვიზიტის ფარგლებში სამუშაო შეხვედრა სტრასბურგის უნივერსიტეტის ხელმძღვანელობასთან გამართა და მათ ქუთაისის საერთაშორისო უნივერსიტეტისა და ადრონული თერაპიის ცენტრის კონცეფცია გააცნო. ამის შესახებ „ინტერპრესნიუსს“ საქართველოს განათლების, მეცნიერების, კულტურისა და სპორტის სამინისტროდან აცნობეს.
შეხვედრის დროს მხარეებმა სამეცნიერო-კვლევითი მიმართულებით, სამომავლო თანამშრომლობის გეგმებზე ისაუბრეს.
„დღეს მსოფლიოში ერთ-ერთი წამყვანი, სტრასბურგის უნივერსიტეტის ხელმძღვანელობას დეტალურად გავაცანი ქუთაისის საერთაშორისო უნივერსიტეტისა და ადრონული თერაპიის ცენტრის პროექტები. მათზე ძალიან დიდი შთაბეჭდილება მოახდინა იმ ფაქტმა, რომ ბატონმა ბიძინა ივანიშვილმა და მისმა ოჯახმა ერთი მილიარდი ევროს ქველმოქმედება განახორციელეს ამ პროექტებში. სტრასბურგის უნივერსიტეტის ხელმძღვანელებმა გამოთქვეს ინტერესი, რომ მათი უნივერსიტეტის პროფესორები და მკვლევარები აქტიურად ჩაერთონ ქუთაისის საერთაშორისო უნივერსიტეტის აკადემიურ პროცესსა და ადრონული თერაპიის ცენტრის სამეცნიერო-კვლევით საქმიანობაში“,-განაცხადა მიხელ ჩხენკელმა.
