რეჯეფ ტაიფ ერდოღანი - ანკარას მოთმინება იწურება, დღეიდან ჩვენც ვიმოქმედებთ!
ანკარას მოთმინება იწურება, - ამის შესახებ თურქეთის პრეზიდენტმა, რეჯეფ ტაიფ ერდოღანმა ბაშარ ალ ასადის რეჟიმის მიერ იდლიბზე განხორციელებული თავდასხმების კომენტირებისას განაცხადა.
მისი თქმით, თურქეთი დამატებით ზომებს მიიღებს.
„სამწუხაროდ, რუსეთი არ ემორჩილება ასტანისა და სოჭის შეთანხმებებს. ჩვენ აქამდე ვიცდიდით, მაგრამ დღეიდან ჩვენც ვიმოქმედებთ. ეს მუქარა არ არის, თუმცა, მოლოდინი გვაქვს, რომ რუსეთი რეჟიმს სათანადო გაფრთხილებას მისცემს“, - განაცხადა ერდოღანმა.
მან რუსეთს დამოკიდებულების შეცვლისკენაც მოუწოდა.
„რუსეთმა პროცესი სხვაგვარად უნდა განაგრძოს. ისინი გვეუბნებიან, რომ ტერორისტებს ებრძვიან. ვინ არიან ტერორისტები? ის ადამიანები, ვინც თავიანთ მიწებს იცავენ?“ - დასძინა პრეზიდენტმა.
როგორც ცნობილია, სირიის სამთავრობო ძალები, რუსული ავიაციის დახმარებით ქვეყანაში მეამბოხეთა უკანასკნელი გამაგრების ადგილს, იდლიბს უტევენ. ადამიანის უფლებების ობსერვატორიის ცნობით, იდლიბის მიმდებარე ტერიტორიების დიდი ნაწილი უკვე სამთავრობო ძალების ხელშია.
v-if="article.gallery" v-html="article.gallery"
