როდესაც საერთაშორისო პარტნიორები გვეუბნებიან, რომ ერთმანეთისკენ გადადგით კომპრომისული ნაბიჯები, ეს ნიშნავს, რომ 100/50-ზე დამთავრდა, -ამის შესახებ „რესპუბლიკური პარტიის“ ერთ-ერთმა ლიდერმა დავით ბერძენიშვილმა ჟურნალისტებს „ლეიბორიტული პარტიის“ ოფისთან განუცხადა, სადაც საარჩევნო სისტემასთან დაკავშირებით ოპოზიციის შეხვედრა გაიმართა.

„ჩვენი მთავარი მიდგომა არის შემდეგი, რადგან დიპლომატები, რომლებიც მაქსიმალურად ცდილობენ ხელი შეუწყონ ამ ფორმატს და იქნებ, შედეგამდეც მივიდეთ, ისინი გვეუბნებიან, რომ კიდევ ურთიერთკომპრომისული წინადადებები იყოს.

რადგან მამუკა მდინარაძე გუშინწინ, მისი განცხადებით, ახლა, ერთი საათის წინ გაკეთებული განცხადებით გვეუბნება, რომ 100/50-ზე - პრაქტიკულად, მან ეს თემა დახურა და თქვა, რომ ოპოზიციიდან ველოდებით კომპრომისულ წინადადებებს. მდინარაძემ თქვა, რომ იმედია ოპოზიცია არ შემოგვთავაზებს 145/5-ს, 140-10-ს , 135-15-ს.

მე ვუბრუნებ და იგივე პროპორციით ვეუბნები, იმედია, ხელისუფლება არ ელოდება, რომ ჩვენ მას შევთავაზებთ 105/45-ს, 110/40-ს, ან 115/35-ს. ასეთ ვითარებაში, ის, რომ 40%-ზე მეტი იყოს, პრინციპი ესაა. პარტია თუ იგებს მაჟორიტარულ ოლქებს მას 40%-ზე მეტი უნდა ჰქონდეს. 40%-ზე მეტის ვერსიები არის და ახლა მსჯელობა მიდის და 130/20-ზე ერთ-ერთი შესაძლებლობაა“, - განაცხადა დავით ბერძენიშვილმა.