დავით სიხარულიძე - საქართველოზე განხორციელებული კიბერშეტევა იმ ჰიბრიდული ომის ნაწილი იყო, რომელსაც რუსეთი  აწარმოებს

„საქართველოს ატლანტიკური საბჭოს“ გამგეობის თავმჯდომარე დავით სიხარულიძე მიიჩნევს, რომ საქართველოზე განხორციელებული კიბერშეტევა იმ ჰიბრიდული ომის ნაწილი იყო, რომელსაც რუსეთი საქართველოს წინააღმდეგ აწარმოებს. დავით სიხარულიძემ „ინსტერპრესნიუსთან“ განმარტა, რომ ამ კიბერშეტევების მიზანია, ძირი გამოუთხაროს საქართველოს თავისუფლებას, სახელმწიფო ინსტიტუტებსა და საქართველოს განვითარებას.

„ძალიან მნიშვნელოვანია, რომ ჩვენი პარტნიორების მხარდაჭერა დაფიქსირდა და დარწმუნებული ვარ, რომ მათაც თავისი წვლილი შეიტანეს ამ გამოაშკარავებაში თუ საიდან მოდიოდა ჰიბრული შეტევა საქართველოს წინააღმდეგ. რაც შეეხება მომავალში მოსალოდნელია თუ არა მსგავსი შეტევები, დარწმუნებული ვარ, მოსალოდნელია, განსაკუთრებით არჩევნების პერიოდში. დარწმუნებული ვარ და აქედანაც ჩანს, რომ რუსეთს აქვს თავისი გეგმები ჩაერიოს საქართველოში არჩევნებში. რუსეთის უშიშროებისა და რუსეთის სახელმწიფოს ხაზია, რომ დემოკრატიული ქვეყნების არჩევნებში ჩაერიოს და არა მხოლოდ არჩევნებში, არამედ ზოგადად სხვადასხვა რადიკალური ჯგუფების მხარდასაჭერადაც. ასეთი ტიპის ჩარევების მიზანია ძირითადად საზოგადოებაში პოლარიზაციის გაღრმავება, საზოგადოების ფრაგმენტაცია, ფრაგმენტირებული საზოგადოების ერთმანეთთან დაპირისპირების გაღრმავება. ეს არის ის მოქმედებები, რომელსაც რუსეთი იყენებს არა მხოლოდ საქართველოში, არამედ სხვა ქვეყნებშიც და აშკარაა, რომ სწორედ ეს მიმართულება არის რუსეთის საინფორმაციო ომის ძირითადი მიმართულება, რაც საბოლოო ჯამში, მიზანად ისახავს დემოკრატიისთვის ძირის გამოთხრას და ზოგადად უნდობლობის გაჩენას დემოკრატიული პროცესისადმი,“- განაცხადა დავით სიხარულიძემ.

კითხვაზე, მზად არის თუ არა საქართველო გამკლავდეს რუსეთის კიბერშეტევებს სიხარულიძემ განაცხადა, რომ „ქართული ოცნება“ ბოლო წლების განმავლობაში აქტიურად ანგრევდა საქართველოს ეროვნული უსაფრთხოების სისტემას.

„თქვენ იცით ეროვნული უშიშროების საბჭოსთან დაკავშირებით განვითარებული მოვლენები, აბსოლუტურად არასერიოზული, არასახელმწიფოებრივი დამოკიდებულება ჰქონდა „ქართულ ოცნებას“ მისადმი. სისტემა, რომელმაც უნდა უზრუნველყოს მწყობრი სტრატეგიის შემუშავება და რუსეთის წინააღმდეგ ჰიბრიდული საფრთხეების აცილება, სწორედ ამ სტრუქტურას და ამ არქიტექტურას აქვს უზარმაზარი ხარვეზები და არ ფუნქციონირებს. მას აქვს როგორც სამართლებრივი, ისე ინსტიტუციური ხარვეზები“, - განაცხადა დავით სიხარულიძემ.

იოსებ ბარათაშვილი - თუ უმოკლეს ვადებში არ გამოქვეყნდა რა აუცილებლობით კეთდებოდა ფარული ჩანაწერები, ხელისუფლებას მოუწევს პასუხისმგებლობის აღება ძალზე მძიმე ბრალდებაზე
ქართული პრესის მიმოხილვა 16.09.2021
ირაკლი მელაშვილი - იმგვარ ვითარებაში, რომელშიც ვართ, საქართველოში ძალოვნებმა დაღუპეს ყველა ხელისუფლება და ახლა დაღუპავენ ამ ხელისუფლებასაც
კრიპტალი მომხმარებლებს 1 მილიონ შიბა ინუს (ელექტრონული ფული) ჩუქნის
BDO Digital-ი SWIFT-ის ოფიციალური პარტნიორი გახდა
BDO Digital-ი კომპანიებს აქტივების მართვის თანამედროვე გადაწყვეტას სთავაზობს
ქართული უნივერსიტეტი საერთაშორისო კონკურსში ნომინაციის ,,მომავლის განათლება’’ გამარჯვებული გახდა